Vecco ca torna maggio, e se ne vene
Lo Piecoro e lo Tauro alla 'ncorrenno;
A li Pisce e a l' Acquario mo foienno
Vanno, de l' Innia a le 'nnaurate arene;
E chiammano chi sulo pe gran bene
Abbracciate se vedeno dormenno,
E azzò la terra e l' airo stia vedenno
Spezza, Apollo, de iaccio le catene.
Vedenno chesto, io dico: “O sfortunato!
Se Febbo spezza chi so' fridde tante,
Comme lo core a Fulla n' ha squagliato ?”
“Brutto porchiacco, e comme sì 'gnorante!
Responne Ammore. E non te sì addonato
Ca lo core de Fulla è de diamante ?”