Ammante. Ammore, tu mme daie troppo schiattiglia,
Troppo me vaie fruscianno lo cauzone!
Perché dareme tanta crepantiglia,
Ch' addesa m' è abbottato lo premmone?
Ammore. Comme sì bestiale e nzemprecone!
Non vì tu chella c' ha da te la viglia
Pare abbottata comme a no pallone,
E da na masca a l' auta nc' è sei miglia?
Videla 'mmessicchiata quant' è bella,
La cocetrigna toia: accossì, sciuocco,
Voglio che tu deviente, comm' a chella!
Ammante. Si chess' è, appilo, e mo la cénta scrocco:
E prego ad Eolo, p' abbotta' la pella,
Me manna addove sape lo scerocco.