Vedennote, isce bello! , o Pimpa mia,
Fare li travocchette a la spagnola,
Chest' arma comme a lècora 'n gaiola
Se mese volontaria 'mpresonia.
Sta 'nnante a l' uocchie tuoie comme a na cola,
Perché li schiecche so' de l' arma mia:
E la scur' essa n' have cannavola,
Ma tu no' ll' aude, e dàile cardaccia.
Ascota, o cana, o core de zefierno:
Non saie ca chi non ha d' auto pietate
Éie esca e frasca e cippo de lo 'nfierno?
Dove s' è bisto sta crodeletate?
Tu abbruscie l' arme a lo cchiù friddo vierno,
Tu ghiele l' arme a la cchiù cauda 'state!