Steva no iuorno che n' avea carrine
E bolea fa' l' ammore e sguancïare:
Perna, vedenno ch' io n' avea denare,
Sgrignaie lo musso e me votai li rine.
Sta cosa m' abbottaie li cularine
E l' appe co no chiuovo a sbennegnare.
Ma po', votato, io disse a la commare:
“Saie che cosa ha sta razza de guaguine?
Dimme, se me vuoi bene, di', Vïola,
Da che prevene tanta tuorce–musse ?”
Ed essa disse: “E che ne faie de cola?
Saie pecché pate tu tutte sti 'nfrusse?
Io te lo dico mo co na parola:
Ca lo vorzillo è nietto de fellusse”.