Piglia ssa bella prova c' aggio fatto!
Aggio voluto ghi' a bede' sta Sdamma?
Aggione scervecchiato sta gran sciamma:
Ora mo nce lo bo', si crepo e schiatto!
Avea dato ad Amore schiacco matto,
Me pareva ogne femmena quarchiamma,
Non voleva amma' cchiù. Mo 'nnitto 'n fatto
Sto core mio pe Citta allanca e abbramma.
Lassaie Quinzia schiaffina e Menechella,
Ca m' aveano la vorza troppo rasa:
Ma Citta è peo de chesta e peo de chella.
Lo càntaro lassaie pe la privasa,
Scappaie da càiro e so' 'mmattuto a zella,
Da la tiella vao dinto la vrasa.