Tu se suone, o Sgruttendio, overo cante,
Faie deventare ognuno mammalucco,
E chi te sente e non deventa stucco
'Nzegnale è ca sarrà quacche 'gnorante.
Chi no' lo sa ca quanno cante, 'ncante,
E resta che non sai s' è biento o cucco?
Chi non lo sa ca tu daie trucco a mucco
A Petracca e Marino, a Tasso e a Dante?
Tu a piede chiuppe chillo tiempo antico
Ne passe, e 'n capo mmierete d' avere
Na corona de lauro, e non de fico!
Tu li poiete faie torna' cetrule:
Ca tanto è lo gran canto e lo sapere
Ch' a fronte a te nce pareno cucule.