Lo Sole avea legato a la carrozza,
Pe parte de Peroo, lo Lïone:
Chillo arraggiato, mo, facea la vozza
Iettanno fuoco da lo cannarone:
De muodo che m' avea sta catarozza
Brusciata, e lo cerviello e lo premmone,
Quann' io a lo pagliaro de Pacione
Corze a lo frisco, e nce trovaie Miozza.
Aimé, ca me 'ncantaie comme a taddeo
Vedendola, 'n facenne, ammassa' caso!
Cossì, pe fare meglio, io fice peo.
Ch' ardiette e disse: “Marzo me n' ha raso
Già da sto munno ! E che streverie veo!
Esce lo sole mio mo da l' O–ccaso !”