2

Dice chi è no chiafeo E c' ha poco iudicio e cellevriello, Ca d' anemale è peo Chi l' ammore non ha a lo cocozziello,

E ch' è no porchiaccone e no cetrulo, O sia viecchio, o sia giovene, o figliulo. E secoteia appriesso C' avere non se pò cchiù gran tresoro,

Si puro t' è conciesso D' avere da doi trezze comm' a n' oro Legata l' arma, de manera stretta Comme a fonecellata o na stanghetta.

Ca non s' àscia cchiù gioia C' avere a zennariello na sguardata, O si la Sdamma toia Tira no vaso e fance na sciosciata,

O si dicesse: “O bene mio, ch' allanco De stare a musso a musso, a scianco a scianco”. Brutto piezzo d' Antuono, Taddeo de le melella, arce porchiacco,

Che 'n capo le dia truono E la mamma ne faccia lo sciabbacco Pocca d' ammore spera ogne confuorto! Ma non dice accossì la Loggia e Puorto.

Perdìje Puorto lo sciore, Pascariello Sgargiato Uocchie–d' argiento, E la Loggia lo 'nore, (Senza dire de l' aute mancamiento)

Ch' era Pacicco; e tutte duie ammaro Quinzia Schiaffina de lo Lavenaro. Sta perchia, sta guaguina Ammava Masaniello, e speretava,

Si be' facea marina Co chille duie perzì, e le 'mpapocchiava Dicenno: “Pe bui st' arma se squaquiglia”: E n' era fora Crapa ciento miglia.

Ma Pascariello 'n frutto Vinto da tanta desperazïone, Non voze fa' cchiù mutto; Sulo se mese a lato no spatone

E, arrasso sia, parìjo tanto smargiasso Che se chiammai de Puorto lo Gradasso. Iette accossì marfusso A la casa de Quinzia, e sagli' 'ncoppa

Pe l' ammacca' lo musso; Essa fui', ma l' afferraie la groppa Pascariello, e dicìje: “Férmate, sguessa !” E cacciai mano sùbbeto a l' allessa.

“Aspetta, aimé, tantillo, Respose, ca me piscio, o bene mio! Non pepeteio né strillo, Ma si m' accide, affé, morarragg' io.

Già so' la toia, a pena de l' aurecchia! 'Nfodara tu nfratanto ssa serrecchia”. Ca marfuso respose Pascariello: “Sì, tu mo me contiente !”

Essa disse: “Ste ccose Tu sai ca fanno aggravio a li pariente: Perzò besogna farele a cert' ore Che non ne pozza nascere rommore.

“Ma si tu me vuoi bene Mo se canosce, si tu fai na cosa: Po' lassa fare a mene, E bedarrai quanto te so' ammerosa.

Sta sera tu, c' hai n' armo arce–gagliardo, Hai da ire pe nfi' a ponte Licciardo. “Va', comme è notte scura, Dove lo 'npiso sta fetente e muorto:

Curre, n' ave' paura, Fìgnete 'npiso co lo cuollo stuorto. Dapo' c' haie fatto chesto tu retorna, E si non te contento e tu me scorna”.

Ce iette lo 'gnorante, Cossì restanno de commegna 'nzembra. Vèccote l' auto ammante, Che data cassia–tratta avea a la fremma:

Dico Pacicco, e benne 'n tale sciorte Che se sarria sbentrato co la Morte. Quinzia, ch' era acciacorva, E che malizie avea cchiù de na vorpa:

“Pe ttene è fatto porva, O Pacicco, sto core, e tu nce hai corpa, Dicette. E te volea manna' a chiammare Ca tu, gioiello mio, me puoi sanare”.

Se ne iette 'mbrodetto Pacicco, lo scurisso, a ste parole, E disse: “Io te 'mprometto, Quinzia, pe tte de revota' lo sole”.

Essa tanno respose: “Tu hai da ire Pe nfi' a ponte Licciardo, e llà trasire. “Ma comme so' doi ora, No' 'nnante né cchiù tardo: e da llà dinto

N' hai da cacciare fora No 'mpiso, lo cchiù frisco e manco tinto. Ma de vestite t' hai da probbedere Comme a chillo che mai pozza parere:

“Vestuto da mmarditto Vance, e ogne ncorna sia na canna, e storta. Vienetenne deritto, E chillo 'mpiso po' 'ncuollo me porta,

Ca me darrai la sanetate, e tune Sarrai de st' arma caso e maccarune”. Pacicco se ne ieze. Veccote notte, e Pascariello 'ntraie

Dove li 'mpise, e steze Manco de n' ora; e sùbbeto arrivaie Pacicco, che parea cossì bestuto Arce–Protone e Re d' ogne ncornuto.

Pascariello de botta, Vedenno lo demmonio 'ntrato llàne, Tutto se cacai sotta; Pacicco ghi' a toccarlo co la mane,

Ed attentanno ch' era frisco e muollo Tutto a no tiempo se lo mese 'ncuollo. Esce e corre, correnno A spezzacuollo 'mmiero a lo Mercato;

Vene na guardia ascenno, Corre lo Caporale, ed arrivato Aprette la lenterna: e arrasso sia! , Quanno ca vedde llà chillo che scria.

Cadi' agghiacciato 'n terra. Li sbirre appalorciaino pe paura, Pacicco alliccia e sferra: Ietta lo 'mpiso e d' auto non se cura.

Pascariello, che 'n terra se vedette, Te fece, o bene mio, netta palette. Pacicco stìjo no poco, Né sentenno cchiù llà tale né quale

Torna a lo stisso luoco, E 'ncuollo se schiaffai lo Caporale: Perché lo trovai 'n terra accossì stiso, Se crese chillo llà ch' era lo 'mpiso.

Tutto preiato corre 'Mmiero a lo Lavenaro, èccote quanto 'Ntróppeca a doie savorre, E la preiezza soia fornisce 'n chianto:

Zoè, ca mente llà 'n terra cadìje, N' arcabosciata 'n cuorpo se sentìje. Lo sbirro avea a li late L' arcabbosciette, e accisero Pacicco;

E nfra poco iornate Pascariello tornai comm' a palicco, Né troppo steze che lo poveriello Corrette da la Morte, a lo maciello.