Pe troppo ire sfruscianno a sto cecato
De Cuccopinto, m' ha schiaffato a l' uocchie
No 'ntruglio de pantosche sfravecato
Addove, o nigro core, te 'mpapuocchie.
Che ne voleva fare io, negrecato,
D' ire 'mpizzanno l' uocchie pe li cuocchie!
Che ne voleva fare, o sfortunato,
D' ireme a 'nnammorare senza truocchie!
Vecco ch' aggio veduta sta gran Sdamma,
Vecco ca so' caduto a sto gran sciummo,
Vecco c' aggio cogliuta sta gran sciamma,
Vecco ca so' scacato e sciso 'n chiummo,
Vecco ca so' speruto (aiuto, o mamma!) ,
Vecco ca so' speduto e ghiuto 'n fummo.