2

O bella Cerere Ch' abbutte e satore Chi abbrammato 'n cuorpo sta, Viene co frateto,

Bacco docissemo, Che li core alliegre fa. No' a 'ncoronareme De spiche o d' ellare,

Io ve cerco, 'n grazia, no, Ma chiste guoffole Venite a 'nchireme, Ca manciare io voglio mo.

Cerriglio sbrènneto Che co lo sciato Li manciune abbutte tu, Non voglio dicere

Quanta fai scorrere Fontanelle a buoine cchiù. Si è pe laudarete De le gran fraveche,

Lo penziero mio non è, Né de le cammare Che stare pòtece Ogne Prencepe, ogne Re.

Non de li guattare, Che Furie pareno, Ch' a lo 'nfierno dinto so': Lo fuoco attizzano,

Li spite votano, E menestrano dapo'. Né di chi sperciano Le butte a furïa

O di chi lo cunto fa, Né de chi a tavola Mente se mazzeca A cantare bello sta.

Ma sulo avantete De chella lagrema Pe chi, aimé, sospiro, sì, De lo Posileco,

Grieco ed asprinio, Che le butte n' hai perzì. De le bonisseme De trippa tenere

Tïanella che fai tu, De carne e bruoccole Pignata e càccave Bene mio, dammenne, su.

Chelle pallottole Saporitesseme Quanto gusto danno a me! E chillo fecato

Zoffritto sapeme Cchiù de mele doce affé. Addove, o gnuoccole, E bui de Cagliara

Maccarune io lasso mo? E chille fecate Co rezze e laoro Che de st' arma core so'?

Chille peduzzole Che se 'ngorfisceno Pe 'nzalata, e 'ncoppa nc' è Menta e cetrangolo,

Pepe e garuofane, Che ne pò mancia' no Re. Ma comme scòrdome, Chiafeo !, de dicere

Pe chi auzato a tanto sì? Ed è ssa grolïa Perché a sse cammare Carnevale nce nasci'.

Carnevale saporito, Core bello, viene ccà, Tu che puorte chisso spito Che de puorco carne nge ha:

Viene, defrescame 'Nnante ched escame St' arma, oimé, ca more già. Chi pò mai de te contare

Le grannizze quanto so'? Cchiù che arena non c' è a mare O a Natale li crò–crò: So' tanta, affécola,

Che se strasecola Chi penzare mai nce vò. Lasso stare li piacire Che pigliare nce fai tu:

E de mascare vestire Co sona' lo zucchezù, E ghi' pe Napole Sautanno scapole

Co chirchiette e trunchetrù. E l' abballe e le 'ntrezzate Da spantare nfi' a no Re, E li saute spertecate,

Lo gridare: “Allé, allé”, E dire: “Vùsciolo !”, “Te' 'n capo!” e “Frùsciolo !” “Vì ca l' haie!”, che gusto ch' è.

Lo tirare d' ova pente, De cetrangola perzì, P' ogne banna che se sente, Dove vai tutto è cossì.

E si n' hai 'spriceto Pede solliceto Zuppo zuppo 'nfuso sì. Co la facce uno d' angresta

Va cantanno: “Ià, ià, ià”; N' auto 'mmano ha na rapesta Ch' a le spalle coglie e dà; N' auto saiettola

Pare, e na pettola Ad appennere te va. Autre danno co pelliccie Che de paglia chiene so',

E a le spalle, si n' alliccie, Na vessica siente po'; E bide scennere Chiena de cennere

Na saccocciola dapo'. Lo sonare de tielle, La campana tucche–tu, Lo sautare de zitelle

E lo dicere: “Sciù, sciù”, Quann' uno tegneno E te lo pegneno Brutto comme a no cucù.

Lo bede' da piccerille Chella rota che se fa: Uno canta, e cchiù de mille Fanno po': “Pernovallà”.

E attuorno vòtano, Sautano e sbotano Le grastolle co sona'. Lo bedere pe na via

Na catubba che gusto è! Uno fa: “Cierne Lucia”, N' auto dice: “Vucce hè”; E si sternutano

Cossì salutano: “Malatia, crepate a te”. Canta po' Masto Roggiero, Ch' è bestuto da Uccialì,

N' auto vene da quartiero, E responne isso perzì. E tanto cantano Che tutte spantano,

E te laudano accossì. Ma che serve sto parlare? Chi sì tu se sape già, E che faccence abbottare

Comme a ruospe già se sa: Chi la penurïa Leva, ed a furïa Buono sbattere nce fa.

Quanno viene e puorte grassa Che contento nce dai tu, Tanno ognuno abbotta e 'ngrassa, Mancia e sguazza a buoine cchiù;

E nfra li strepete De spite e tripete Suono mai cchiù bello fu. Tu nce dai le ghielatine

Che 'n vederle io squaglio, aimé, Voccolare e pettorine Che songo arma e core a me; Saucicce e rosole

Che maie io pòsole S' abbottato non so' affé. Chillo bello sango cuotto, Le stigliole, aimé, che so'?

Chillo appriesso, ch' è biscuotto Si a lo spito puosto è po': Chi tanto fàcence? Chi tanto dàcence?

Carnevale, dillo mo. Colarine e sanguinacce, Lo pane unto che se fa, Bene mio ! e li migliacce

Pe chi st' arma se desfà: Tu sulo puortece E tu confuortece Co na grassa libertà.

Sorzetare a chillo sciauro De li vientre se senti' Chisto core, e da lo lauro, Fecatielle, a bui scegli'.

De cheste grazïe E cchiù nce sazïe, Carnevale, tu perzì. Chille belle pïattune

Zippe zippe a buoine cchiù De lasagne e maccarune Chi le dace si non tu? Aimé ca 'nziecolo

Vao e strasecolo, Che mai ommo a tale fu. Vienetenne, o core mio, No' me fa' sperire, oh, oh,

C' apre canna lo golìo, Già me 'ntenne e fa: “Cò–cò”. Viene, consolame, Sti diente ammolame,

Ca 'ngorfire io voglio mo.