Steva a spennare Ciomma na gallina
A la fenestra, quann' io la vedette,
E perché stea 'n facenne a la cocina
S' era tutta sedonta de vrodette.
Avea pe mantesino na mappina,
La facce tenta da li pozonette:
E mentre iea a ghiettare a na latrina
Le penne, essa me vedde e se ne iette.
St' arma da pietto me sentìje scrastare,
E strillai: “Fremma, o core sbisciolato!
Ssa facce tenta, oimé, torna a mostare!
Venga chi vò vede' Febbo aggrissato,
Dïana dinto a l' ombre allummenare,
E 'n guattara Coppido trasformato !”