Mo sì ca chella secca e spremmentata
De Morte t' have annegrecato, o Amore,
E da lo regno tuio lo sciore sciore
La sgrata ne sciosciaie da la pignata.
Aiméne, aimé, ca n' have scervecchiata
La grazia, la bellezza e lo sbrannore!
Ma faccia quanto vò, ca da sto core
Non ne la scrastarrà maie, ssa cecata!
Sulo na cosa, tu, Morte, puoi fare
Pe scaca' chillo nomme e darle tossa:
Sta sfortonata vita 'ncerrecciare.
Ma che ? A despietto tuio dinto a la fossa
La bella famma soia non ce pò stare.
Tu, comme a cana, spóllecane l' ossa.