Uh quanta vote e quanta aggio cercato
De fa' lo nomme mio vola' pe tutto,
E quanta vote n' aggio sosperato,
E nfra sospire puosto quacche grutto!
E quanta vote Apollo aggio pregato,
Presentannole n' uosso de presutto,
Che m' avesse quaccosa 'nfrocecato:
Ma a l' utemo accossì me disse, 'n frutto:
“Sgruttendio, pocca haie tu a la catarozza
De farete 'mmortale, e ne sì muorto,
E tanto è lo golìo che te scocozza,
Va' 'mpara da Sciacquetta che sta a Puorto,
Ca chisso vence ogne poeto, e sbozza
Da Bacco a Tilo e da l' Occaso a l' Uorto”.