Ammore, cecavoccola, asenone,
Pecché me frùscie e me saìtte tanto,
E chella cana pe chi stongo 'n chianto
Lo suonno le faie fa' de lo premmone?
Avierte, Ammore, ca non so' Pratone,
O fattocchiaro, fuorze, o nigromanto,
O musechiero, addove co lo canto
Te potesse fa' auza' connizïone.
Auto non pozzo fa' che ghi' gridanno
E mostare ad ognuno st' uocchie affritte
Che sciummare de lagreme se fanno.
E sti duie vierze portaraggio scritte:
“Ammore è sangozuca, e ba zucanno
Le robbe, e li cervielle manna a mitte”.