Bella mia sguancellata, aimé, ch' Ammore
T' ha fatto chesse deta storzellate
Pe ancine, addove l' arme ce ha 'mpizzate,
Overo p' amme da pescare core.
O so' borpare da tira' li cate
De lagreme, da st' uocchie, de dolore?
O cacciacarne, che da le pegnate
De l' arme tire li sospire fore?
Ma no, ca s' io contempro a sse stortezze
So' crocche, addove è appiso lo confuorto,
Ancora pe da' funno a l' allegrezze.
Io so' basciello, e corro a te pe muorto:
Siano rimme sse mmano, e chesse trezze
Le ffune, e chisso pietto me sia puorto.