Ammore, dimme, che malanno è chisto?
Che gliànnola mmardetta t' è afferrata?
Comme a 'nchiaiare st' arma sfortonata
Te truove sempe prunto e sempe listo?
Perché, pe trommentareme, staie 'nzisto,
Né nciesse maie arreto na pedata?
Ammore, affé, co mico l' haie sgarrata,
Ca non me trovo, no, tanto sprovisto!
Saie che nce mecco a fa' netta–paletta,
E bao correnno, e facciome p' amico
Sdigno, che te 'ncotogna e te carfetta?
Mo tanto me ne scuso: e lo sopierchio
Tu saie ca dice lo proverbio antico
Ca rompe lo pignato e lo copierchio.