Dimme la cauza, o bene mio, pecché
Co mmico tanto arraggiaticcia sì:
Si t' aggio fatto quacche cosa, di',
Ca me sbodello io stisso da pe me.
Quann' io te parlo, non me ascute, aimé,
Che comme a piccerillo chiagno, vì,
E perdonanza te cerco perzì;
Piglia sto core mio, straccialo, te'!
O Prezïosa, non me siente, oh oh,
Che tosta sì de sti vrecciune cchiù?
Fremma no poco, e non fuire, no.
O lebertà, te n' allecciaste tu,
E pe la canna me fai fa' cò–cò:
Ma a chesto, Ammore la corpa ne fu.