Ammore, di', che 'nnore n' haie zampato
Ch' a trademiento arreto m' haie feruto?
E de cchiù, a la sprovista sì benuto
E m' haie trovato tutto desarmato!
Tu saie ch' io steva miezo addormentato,
E quase, pe lo suonno, ascievoluto,
E creo ca me feriste co no muto,
Perché me senco miezo smedollato.
Ma Cecca, aimé, lo tòtano me sbota,
E paro comme a chillo scollerito
A chi fu dato co no chiappo vota.
Ma si de sta manera sì comprito,
Ammore, lo centimmolo va' rota,
E co sse frezze va' spilanno acito!