Belli pedale miei, cosa de spanto,
Duono troppo de sfuorgie e de grannezze,
Fatte de cannaviello e de capizze
Ceniere comme a pella d' alefanto.
Aimé, quanto ve faccio cchiù carizze
Tanto a chist' uocchie miei cresce lo chianto,
E quanto cchiù ve sguardo st' arma tanto
Co chisto core mio se fanno acizze.
Pedale de pezzolle prezïose,
O mammoria de Cecca, vuie secure
State de non servire cchiù a ste cose!
Pedale, de pedale li segnure,
Fatte da chelle mano grazïose,
Mme sarrite collare e maccature!