Mo che t' hai fatta ssa galante vesta,
Co chisso tuppo a mmuodo de sopposta,
Pare comme a no gallo co la cresta:
Ma l' uocchie russe so' cchiù de ragosta.
Ssa facce ha lo colore de l' agresta,
E pare na porchetta co la crosta:
Chi te vede, a pigliare va de posta
L' orvietano, ch' è contra de la pesta.
Scommuoglie lo defietto co ssa robba.
Chi tene mente a ssa foggia novella
Vede sso gra' scartiello, e po' se strobba.
Zitto, ca la gallina patanella
Se bene è bascia, peccerella e sgobba,
Puro è tenuta pe na cosa bella!