Si songo tutto sciamma e tutto ardore,
Che paro iustamente zorfatara;
Si so' chino de fuoco e d' abbrusciore,
Comme de chianto faccio na sciumara?
Mo sì ca pozzo dicere ch' Ammore
M' ha cuotto co duie vulle a na caudara:
Ca ne fa' 'mmertecare e 'scire fore
Lo chianto da chist' uocchie 'n vena amara!
Io passo de freddezza nfi' a li iacce!
Io passo de caudezza nfi' a lo ffuoco!
E songo cchiù berduoceno dell' acce!
De le 'nfernesche pene io so' lo cuoco,
Ammore, e tune, zuca–sanguinacce,
Perché dinto a lo 'nfierno non ce haie luoco?