Puozze ave' de cecala lo destino,
Che tanto canta fi' che crepa e more,
Cevettola mmardetta ! E che a tutt' ore
Sicco te pozza sta sso cannarino!
O puozze 'ncappa' 'mmano a cacciatore,
Che de iuorno te porte a no giardino,
E d' aucielle burlata, po', llà fore
Puozze legata sta', comme a chiappino!
O la pepitola aggie, arma de cana,
O puozze avere tu la vita corta
Comme l' ha avuta Cecca sta semmana!
Scria a lo 'nfierno co la mala sciorta,
Addove nata sì, brutta 'Mbriana!
Ma che me serve, mo, si Cecca è morta?