Fatto c' appe chiste uocchie pisciarielle
Tutta na notte, m' addormiette 'n frutto;
E dormenno perzì facea grecielle,
Ca Cecca, core mio, morette 'n tutto.
E mente mo no strillo e po' no grutto
Ietto assaie spisso, comme a monacielle,
M' apparze Cecca, e disse: “Ched haie gliutto?
Vì comme bella so', tutta gioielle!
Se m' ame tu cerca venire a me:
Fa' cunto ca ioquammo a covalera,
Io so' nascosa già: vienola, te'”.
Io me sosiette e corze de carrera,
Ma 'nnitto 'n fatto me scetaie perché
Tuosto de fronte dìje a la cemmenera.