Fui 'mmitato a na iostra ed io ce iette,
E me credeva a tutte de sbozzare:
N' aseno primmarulo ghìje a buscare
Che sapea fa' carrère e fa' crovette.
Ma che ! A la primma corza che facette
Mille vernacchie mésese a sparare,
'Ncignaie a ghietta' cauce e ad arragliare,
E tanto sautaie forte ch' io cadette.
Vecco l' allucca ! E chi dicea no mutto,
Chi me volea 'ncenza' co n' aurinaro,
Ch' abbesognaie fuiremenne, 'n frutto.
Cossì, da ntanno, io canosciette chiaro
Ch' è bero ca no cunto fa lo gliutto,
E n' autro ne fa po' lo tavernaro.