Pareno iuste doi commine d' aglie,
Grannizia, chesse trezze a canestrelle:
E cchiù colure hai tu ch' a le gonnelle
De le Torrise non ce so' retaglie.
Dui peparuole so' sse lavra belle,
Ma pe chest' arma ardiche e totamaglie
Che mme 'ntorzano a ffi' a le coratelle,
Po' me le senco a muodo de sonaglie.
Tu passe de bellizze a Galïone!
So' tornato pe tte no zorfariello,
E sto pe fare, aimé, quacche scassone.
Tu sì de chisto core lo scarpiello,
D' ogne allegrezza mia scacamarrone!
Si n' è lo vero, m' esca lo scartiello!