Addonca, chi n' hav' oro non ha niente,
Ed ogne cosa ha chi possede l' oro?
Io, che n' aggio na maglia, a sti trommiente,
Senza spera' confuorto, aimé, ca moro! ,
Ardo pe Cenza mia, ch' è no trasoro:
Ma me ne pozzo spizzola' li diente,
Ch' a chiste tiempe, singhe Turco o Moro,
Ed agge truocchie, c' averraie contiente!
Mo vò na Sdamma, pe ghi' lénta e pénta,
E ave' na copia d' oro zitto e muto,
Ch' a la copia lo cuorno se nce aumenta.
'N frutto, mo chi n' have oro è no paputo,
E pe denare l' ommo se contenta
De friso essere piecoro cornuto.