Aggio cantato 'ncoppa ad Antegnano,
Passa millanta mise beneditte,
Credenno d' appraca' n' armo de cano
Che m' have già ste coratelle sfritte.
Ma quanto cchiù aggio fatto st' uocchie affritte
E 'nfuso co le lagreme lo chiano,
Tanto aggio avuto, aimé, mille nnesditte,
E tanto aggio pigliato io cchiù vaiano.
Perzò corro mo a te, damme conziglio,
Tu che sì letterummeco e saputo,
E sì frate d' Arfeo, d' Apollo figlio.
Oh, va' sona llà tu sso calascione,
Che bence de docezza ogne lïuto,
E falla manza cchiù de caperrone!