Ancora non s' avea l' Arba novella
'Ntrezzato l' oro dinto a li capille,
Quanno 'ncignaie Ammore a ghietta' strille,
E disse: “Tolla va' a bedere, bella”.
Sùbbeto io corze a chella fenestrella,
Passo e repasso cchiù de vote mille,
Pe nfi' che a ghiuorno po' vidiette chille
Occhiùzzole luciente comme a stella.
Me 'ntise no gran viento a le medolla:
Mente correa pe me 'nforchia' a na stalla
Me scappaie no vernacchio 'nnanze a Tolla!
Essa lo 'ntese, e se facette gialla,
E disse po', cchiù rossa de cepolla:
“Crepa lo piezzo, e sanetà a la palla !”