Li viente hai 'n canna, o Pascaddozia, tune,
Mente ca sse parole so' stracquate
P' ascire prodïanno a sbottorune?
O so' de tricchetracche 'mmottonate?
O nce hai li zerre–zerre appiccecate?
O pe la canna hai fuosse e sgarropune,
Dove piglianno mille 'ntroppecune
N' esceno sse parole strammazzate?
O fuorze ogne parola èie no cato,
Sso pietto è puzzo, e pe tirarle suso
Rotta è la funa de sso bello sciato?
Ma no, ca parle tu cossì cianciuso
Perché sì no Copinto speccecato,
E Ammore, ch' è nennillo, è trattagliuso.