“Brutto porchiacco”, io me lamento e strillo,
E dico: “Cecca non me vole bene”.
Che corpa nce have Cecca s' io so' chillo
Che no' le saccio scommoglia' ste pene?
Perché pe la paura che me vene
Quanno la veo, devento no tantillo,
E s' io le parlo, manco parlo, aiméne,
Ma iusto regnoleio comm' a moscillo!
S' io tanno me 'ntartaglio e agghiaio 'n tutto,
E torno nigro cchiù de pastenaca,
Addonca, pecché po' sospiro e grutto?
Arma, no' cchiù trevoliare, scaca!
Parla chiamo, tu saie comm' è lo mutto:
“Lengua che no' la 'ntienne, e tu la caca.”