Se non me disse tu chisso confuorto,
Che me dace armo a 'ntra' fra vertoluse,
Comme a cetrulo ammentecato a l' Uorto
Starria, co li penziere miei confuse.
Tu che sì sciore de Forcella e Puorto
'Nfrócecame ssi conciette grazïuse,
Ca de sape' cantare io songo muorto;
Perché non mme faoresceno le Mmuse.
Poeto comme a te n' è stato ancora,
O Smorfia mio, e cante 'n tale sciorte
Che na tigra perzì se ne 'nnammora.
Tanto co ttico Apollo fu cortese
Che boze che la fauce de la Morte
Te servesse pe spata a sso paiese.