Fermate, eilà, tu che cammine e passe
Pe chesta via, addove c' è sta fossa,
Che è accossì bella fatta, e granne e grossa,
Perché c' è Cecca mia, che me dea spasse.
Che lo mmarditto, eilà, non te cecasse
A non ghiettare sciure 'ncoppa a st' ossa!
Ca si 'n desgrazia na pedata haie mossa,
E chesto passe, lo culo nce lasse.
Ma iettance vïole, e po' nce abbocca
La porvera de rose e de mortella,
E di' accossì, co na piatosa vocca:
“Sorece o vierme a ssa carnumma bella
Maie pozza rosecare, e si te tocca
Sia arzeneco ssa porva e sementella !”