Spata scapizzacuolle, accidetara,
Che n' haie millanta sfecatate e accise;
Spata che faie veni' la premmonara
A Turche, a Muore, a Griece e a Sciannanise;
Chi te vede arrancata, affé, a cantàra
S' énchieno de schefienzia le cammise!
E 'nguaggio co chi vò ciento tornise
Ca tu ad ogni auta spata faie fa' zara!
Tu a lo gran Micco Passaro serviste,
E bona te sfrosciaie, pe l' appetito
C' appe de sferrïa' co chille e chiste.
Scatozza mo t' ha fatto auto commito:
E tanta n' ha 'nfilate, e buone e triste,
Che t' ha fatta torna', da spata, spito!