Quanno contempro, o Lella, a sso sbrannore,
E massema si sguardo a ssa vocchella,
Pe nce ferire nce have puosto Ammore,
Pe diente, ad ogne mmasca na frezzella.
O sì porca sarvaggia, e sanna è chella
Ch' ad ogne banna de la vocca hai fore,
E tanto cruda essenno quanto bella
Co chesse sanne smàfare li core?
O sì alefanta, e muste de tenere
Diente d' avolio, e 'n chesta forma nata
Pe fare ogn' arma chiagnere e dolere?
Bella alefanta mia, na mozzecata
Contentariame da ssi diente avere
Si be' ca fusse tu cana arraggiata!