Quanno se iette Cecca ad atterrare,
Cecca, de st' arma mia carne co foglia!
Tanto fu lo dolore e la gran doglia
Che Napole s' avette a spreffonnare.
Restaie, chi la potette resguardare,
Tutto no piezzo, comme fosse nnoglia,
E l' airo s' ascuraie co certa 'mbroglia
Che nce appe propio a fa' 'mparasaccare.
Le chiaveche, pe cchiù cosa de spanto,
Pe sospire facettero perzìne
'Scire lo fieto a chisto e a chillo canto.
Nascìjero pe le chiazze ardiche e spine,
E le case, pe signo de lo chianto,
Schiattaro li connutte a le latrine.