Da le sette celeste a me no' sguiglie,
Che maie no' stanno no tantillo abbiento,
Fortuna, ma pe dareme cchiù stiento
Tu da lo 'nfierno lo cammino piglie.
Perché non rota e fa cchiù para–piglie
Ssa rota, che parea molino a biento?
Fatta è pe mme na rota de trommiento,
Lo boia tu, che tanto me squaquiglie.
Cierto è cossì, pecché si chessa rota
Votasse, io no' starria sempe 'n fracasso,
Ma dapo' chianto ridarria na vota!
O fuorze, pe non dareme maie spasso,
Mente tu vuote a chesta e a chella vota,
De chella rota, aimé, m' haie fatto ll' asso?