S' era sosuto da lo pagliariccio
Mase, accellente museco, a sonare,
E s' era puosto, bello, pe crapiccio,
Accossì co la cetola a cantare:
“Fare me voglio na scoppetta a miccio
E de palle la voglio carrecare,
Pe la tirare a Tolla, c' ha lo riccio
Che m' ha feruto, e non me vò sanare”.
Tolla lo 'ntese e disse: “A me bozzacchio?
A me co la scoppetta viene sotta,
E puorte a la smargiassa lo pennacchio ?”
Mase respose: “Pigliate sta botta !”
Auzaie la coscia, e fece no vernacchio
Che parze no pallone quanno sbotta.