Pe Cecca st' arma squàcquara e squaquiglia
E comme a sivo de cannela squaglia,
E faccio vampa comme fa la paglia
O comme a porva quanno fuoco piglia.
Ma si no' m' amma non è maraviglia,
Pecché me trovo senza na retaglia:
Ammante affritto che non ha na maglia
Se devarria grattare co na striglia!
Che serve a fa' la museca e la veglia,
E co lo canto dicere la doglia,
Chill' ommo ch' è de povera fameglia?
Non resce de lo povero la 'mbroglia!
Trova lo ricco la cchiù grossa treglia!
Chi confiette non ha, cocina foglia!