1

Dimme, Ammore, scucce–muccio, Masto Muccio, Nonnatura, doletura, Comme tu li core arruote

E le sbuote Cchiù de 'nciarmo e de fattura? Comme tu, scazzamaoriello, Cecatiello,

Tanto puoie e tanto faie? Comme tu spare ssa frezza? Co destrezza A no core comme daie?

Tu na vota non ce vide, Comme accide? Comme n' arma tu sbennigne? Quanno tire e po' faie tuffe,

Comme affuffe, Comme curre e te ne sbigne? O quaccuno me pò dire Pe fuire

Ca tu puorte chesse ascelle: Ma pe cogliere deritte Comme affitte, Quanno spare, sse frezzelle?

Tu legate puorte l' uocchie: Comme arruocchie E li core ne cottìje? Chessa pezza fuorze è acchiare

Che straspare Pocca tanto tu cappìje? Creo ca figne essere nato Tu cecato,

E baie nudo e senza niente Pe cerca' l' arme a l' ammante Co li chiante, Comme fanno li pezziente.

O te 'nfigne no nennillo Ch' a no strillo Vuoie ch' uno t' accarizza? Ma 'ngrannuto nce stroppìje,

Va', che scrìje, Che na funa te scapizza! Ah, ca tu non me nce cuoglie A ssi 'mbruoglie!

Marramao, ne so' scappato! Te credìje quann' era anchione, Babbïone: Ma mo so' matricolato.

Io piatà de te n' aveva, Ne chiagneva, Nfi' che 'ntraie dinto a lo bisco: Ma tu po' me sbennegnaste,

Smafaraste, E a fa' peo sempr' iere frisco. E quann' io regnolïava, Spiretava

Pe bedere Cecca mia Tanno bello tu redive, Ca vedive Ch' io moreva, arrasso sia!

Bella cosa: va' t' avanta Ch' a millanta Core faie la cannavola! Va' 'mpapocchia a chi vuoie tu,

Ch' io maie cchiù 'Ncapparraggio a ssa tagliola. Già te saccio e te canosco, Non me 'nfosco,

Non me 'ncanto cchiù a ssi chiante: Va' 'n gattimma quanto saie, Niente faie, Perché cchiù non songo ammante!