De li trommiente tuoie ecco l' affetto,
O Ammore, e già m' haie consomato e strutto,
E st' uocchie russe miei pareno 'n frutto
Nateche de vracone de moretto.
Aimé, già me ne scolo e bao 'n brodetto,
E lo sciato se n' esce a grutto a grutto,
E paro iusto spito de banchetto
O n' uosso spollecato de presutto!
S' uno me vede tanto scontrafatto
S' agghiaia, e sta pe la paura zitto,
O se la coglie, bello, guatto guatto.
E chi a notte me vede accossì affritto
Me crede monaciello a lo retratto,
O no scazzamauriello, o lo mmarditto.