E quanno fornerrai tu, cecatiello,
De fareme tantillo arrequïare?
Ah, non me fare cchiù regnolïare,
Ca perdere me faie lo cellevriello.
Tu m' hai legato co no foneciello
Ch' ascire non ne pozzo, né scappare:
Et io me metto a chiagnere e cantare
Come 'n gaiola sòle fa' l' auciello.
Ma se te canto cchiù de na canzona
Dimme, pe premmio che me dai tu, frate,
Sopra lo bello monte d' Alecona?
Vattenne a le berdumme spampanate,
Famme tutta de sciure na corona:
Ma de sciure de vruoccole spicate.