1

Quanno buono contempro a la Fortuna, Ch' è femmena spogliata, sbriscia e froscia Comm' a na palla moscia Tutta capille, misera e dïuna,

Attaccata a na funa Na vela foiticcia, entro 'mpensiero Ca cierto è chesto, se non so' sommiero. Zoè: femmena, cosa assai 'mperfetta

Spogliata, che non saie dove acciaffare: Né la puoi mai pigliare, Ca vota facce e co la vela annetta. Vola cchiù de saietta:

E perzò creo che disse no saputo: “Chi crede a le speranze, è no paputo”. St' ommo saputo fu no gran poeta, Ma comme a tutte l' aute sfortonato,

Ca mai poeta nato Ebbe bona chianeta: Si fuie da ccà a Gaieta N' ave' paura, o faccia zumpo o ballo,

Che le pozza cade' mai no cavallo. Sempre nuie stammo sbrisce e scotolate, E le desgrazie a tommola sentimmo. Oie cchiù peo de primmo

Nce asciammo, e de lo vierno peo la 'state. Mare nuie, sfortonate, Ca ped auzare nnommenata e famma Non ge fa avere la Fortuna argiamma!

O Apollo, che tenuto iere 'nnevino, Mo sì passato pe non gran bozzacchio! Teneno pe bernacchio Sso forore profeteco e devino,

Quase fosse de vino: E chi mo parla co le carte toie Schifato è cchiù de Mastro Antonio boie. Anze, ca peo assai simmo tenute!

E pe desgrazia nosta ogne pezzente Ce sgrigna e tene mente; E diceno cierte asene vestute, Cierte straccia–vellute,

Tutte pezzolle, brénzole e retaglie: “Canta poeta mio, ca piglie quaglie !” E nce fanno l' allucca co la baia, Chiammannoce poete asciutte e sfritte

Comme a fiecate fritte, O comm' a cano rognuso ch' abbaia Nce cresceno la chiaia, Che quase nce arredduceno a la morte.

Ma a chesto curpe tu, cecata sciorte! Quanta cchiù nui, pe dicere galante, Parole asciammo a sostene' li vierze, Nce smacche co revierze,

Ce struppìje da la capo nfi' a le chiante Co scoppole e carcante: E quanto cchiù trovammo 'mmenzïune, Tanto parimmo asciutte ossa de prune.

Perché te l' haie pigliata co nuie tanto, Fortura ? Quanno mai fìcemo male? Nui parimmo 'spetale! Ma oimé ca parlo, aimé, co chi pe spanto,

Pe ce fa' stare 'n chianto, Scritto have a chella rota con che bota: “Ogne poeta chesta rota arrota”. Quanto abbottai de guallara e scartiello

Dica Giovanne de la Carriola, E lo poeta Cola, Iunno cecato, Nardo e Iacoviello, Perzì Bennardiniello,

E sopra tutte chella gran cocozza, Ciardullo, dico, lo poeta Vozza. Chisto appriesso a Ceccone, ommo saputo De l' arte soia, ch' era pegnetore,

Nce stette a tutte l' ore P' avere no retratto, e stea speruto, Pareva ascievoluto; Ceccone, pe fenire sto taluorno,

Lo retraiette tutto ne no iuorno. Vozza se schiaffai sotta lo retratto Ed a la casa lo portai deritto; Po' lo sguardava fitto,

Mo lo metteva a chisto e mo a chill' atto. Era 'mpazzuto a fatto, Sautava pe la casa de preiezza, Né capeva a la pella d' allegrezza.

Va a pigliare no chiuovo a no pontone: Vene la gatta e chillo quatro abbraccia, Sgraffignanno la faccia, Ca se credea che fosse no premmone.

Tira isso no scarpone, La gatta se n' addona e se n' arrassa, Chillo coglie a lo quatro, e lo sfracassa. Se nce trovai llà a canto la gallina,

Sentìje la botta, ed essa leggia e lesta Volai pe la fenesta; Se n' addonai maddamma Carmosina, Ch' era vecchia fuina

E mamma de Petrillo, e non potìje Zoffrire tanta perdeta, e corrìje. Na pollecara le mettette 'n canna; Petrillo va a pigliare lo mortaro,

E afferrai l' aurenaro: Chillo era chino, e se rompìje a na vanna. Tremmai comme a na canna La vecchia a primmo, e strillai comme a pazza;

Corze 'ntosciata, e pigliaie po' na mazza. Tira no cuorpo, ed isso fasse arreto, Che no' l' avesse còuta chella botta; Trova na mmerda sotta

De la gallina, e sciulïai nnereto: Cade mo sto Poeto. Tanto tuosto schiaffai 'mpietto a lo muro Che nne rompette no 'ntofolaturo.

Chillo era no connutto de samenta, E steva chiena chiena la privasa: S' enchie tutta la casa, E berde 'mbruno l' astreco deventa;

Isso na facce penta Se fece, e cchiù s' asciai scornato 'nfine, Ca pe aiuto chiammaie ciento vicine. Non sulo la samenta isso rompette,

L' aurinaro, la capo poco poco, Ma vèccote mo lloco Ca la gallina 'n frutto se perdette, E la gatta foiette,

La mamma lo mmardisse, e se scassaie Lo quatro, isso scornato, e se cacaie.