Ora su, Maste, veccoce allestute,
E ccà bolimmo correre e fa' danze;
Vui mo sonanno cetole e lïute
Stateve 'nnanze.
O tu de st' uocchie vìsciola e popella,
Cecca mia cara, affacciate da lloco,
E sta 'ntrezzata sbrènneta tu, bella,
Vide no poco.
Mo vecco comme zompo e comme sauto
De chisto calascione ad ogne ntrillo,
Che faccio saute miezo miglio ad auto
Cchiù de no grillo.
O che gran zumpe Minaco mo face!
Ciardullo attuorno róciola e se sbota,
Lo maccaturo Tòntaro me dace
Pe fa' la rota.
Che schiassïa' de zuoccole fa Pinfa!
Comme se move téseca Iustina!
Ma cchiù se cerne e còcciola sta ninfa,
Dico Masina.
Stienne ssa mano, scótola ssa gamma,
Fa' repolune e bòtate a la 'mpressa,
Nina, a te dico ! Sienteme maddamma
Vocca de sguessa.
Orsù, lassammo pettole e tovaglie,
Giuvene e ninfe, e 'nzemmola pigliate
Co li chirchiette, scìsciole e sonaglie,
Nude le spate.
O bravo, affé, de tronca mo ïammo!
Passa tu priesto, Minaco, pe sotta!
Sbatte ssi piede, Tòntaro, e nui 'ntrammo
Tutte a na botta.
O bella chiorma, sécota mo attuorno.
Priesto, Ciardullo, vòtate da ccàne!
Eilà, me vuoie rompere no cuorno?
Auza sse mane!
Ora su, vasta, scómpase sto iuoco
Sia tutto chesto a grolïa de Cecca:
Cecca, de st' arma sciaccola de fuoco,
Anze, na zecca.