na de wijse De nachtergael int wilde
ALs Noach deur tbedwyngen
des doots verscheyden waer
zijne Nacomelyngen
al ouer menich Jaer
int lant zinaer gyngen
sy vergaderen haer
Elck in dese Lantpale
heeft hem nedergheleyt
hadden Eenderley tale
al zonder onderscheyt
sy hebben altemale
tot malcander gheseyt
Wel op laet ons gaen maken
een stadt en thooren schoon
wiens spitse sal ghenaken
des hemels hooghen throon
eer wy misschien gheraken
hier en daer met der woon
Datmen namaels beseffen
ons cloecke daden mach
dus op een velt seer effen
tghebacken steenhoop lach
dit stoutmoedich verheffen
Godt haestelick aensach
En hy heeft haer ghesonden
verweeringe confuys
malcander en verstonden
sy niet twas al abuys
zoo dat sy niet en conden
optimmeren dat huys
Doen moest dese armeye
verstroyen wijt en din,
hier door babels contreye
vercreech den name, in
welcker Menigherleye
spraken nam haer begin
Dolinge en practycke
in babel noch ontstaen
setten en dierghelicke
heeft sy ghenomen aen
en daer om sal haer rijcke
ghewis moeten vergaen
1609. Weest op v hoede