Stem: Een Plantsoen schoon boven allen.
WAnneer Og sijn Reuse-leden
Woud verquicken door de baeck,
Soo lagh hy in rust en vrede
Schoot-vry voor de dulle wraeck:
2. Want hy stack sijn grove schoncken
In een yseren Bolwerck,
Tot sijn slaep-plaets vast ghekloncken,
Onbewegelijck, en sterck.
3. Maer de vromen, die beschermingh
Soecken voor haer swacke Ziel,
Loopen toe tot Godts ontfermingh,
Daer noyt vyandt binnen viel.
4. Daer en sijn geen vaste Steden,
Noch daer is geen ys'ren Slot,
Daer men alsoo rust in vreden,
Als in't heyl van onsen Godt.