Stem: Roosemontje, soete beckje.
SEecker Volck dat niet en soghte,
Als dat het bedriegen mochte
't Schrander Oogh van Josua,
Quam voor hem, en badt ghena.
2. Toonden hem verschimmelt eten,
Ende kleeren gants versleten
Of haer huys op eenen gront
Onder d'ander Hemel stont.
3. Nochtans quamen zy niet dwalen,
Wt soo ver gelegen palen,
Maer haer woonplaets was na by.
Siet alhier een Schildery,
4. Van de Tyber-Godtsche-bende,
Die haer gangh oock na ons wenden,
In de schijn van oude leer,
En navolgers van den Heer.
5. Maer schoon zy in hare stoutheydt
Roemen op haer grijse Outheydt,
't Is een Gibeons ghewaet,
Oudt in schijn, en nieuw in daet.