Stem: Hoe schoon licht ons de Morghen-Ster?
AL werckt den ouden Sathan snel,
De Schilder-kunst kan hy niet wel
Dat is licht te bewijsen;
Een Schilder-stuck dat aerdigh zy,
Sal in het aensien van na-by
Hem selven loflijck prijsen;
Maer yet // dat niet
En is aerdigh
Siet-men vaerdigh
Vol met vlecken,
Als men het by 't oogh doet trecken.
2. Ick segh, wanneer ick dit aen-merck;
Foey ! Sathans lompen Schilder-werck !
't Welck is de lust der sonden;
Het toont van verren wel een glants,
Maer komter by, soo sal het gants,
Vol smetten sijn bevonden
Wel bot // ja sot
Sijn die gheenen,
Die noch meenen,
Dat vermaecken
In die kladden sijn te smaecken.