Haestighen raet-slach.
CRacht sonder goet verstandt is ydelheyt en waen
Die menichmael sal door syn eygen sweert vergaen,
Tis ongeregeltheyt, die niet sijn eyghen saecken
Met rypen raedt beleydt: en seker soeckt te maecken,
Want inde haesticheyt van raed' veel misslach steckt
En is gevaerelijck om dat hy twist verweckt,
De laete vrucht lancxt duert, de vroege sal eerst rotten,
De jonghste wol word' oock eerst geten vande motten,
En t'levend' oordeel dat m'in jonge kinders siet
Jae buyten het gemeyn vande natuer, is niet
Als onvoorsichticheyt, roeckloos, vermetende
Onprysbaer, haetelijck, en haest verghetende,
Maer die met kennis van goet oordeel, wysen raedt
En reden saecken dryft, thoont dat hy t'stuck verstaet.