Op de wijse: Och en waer ick noyt gheboren, &c.
ALs Phaebus in de Lenten
Vand' Nymphen wert besocht
Hebben haer Instrumenten
De Musen daer ghebrocht.
Waer Pegasus vloeyt
En wort besproeyt
Van't Heliconsche vocht.
Ops, Pallas, en Aurora,
Die vlochten heel verheucht,
Een Eycken crans met Flora
Met blijschap inde vreucht,
Ende tot spijt
Van haet en nijt,
Verbreyden sijne deught.
Van die in liefde groeyen
Crijght Mars nu eenen schroom,
Om dat sy comen boeyen
Den twist met redens toom,
Want al sijn macht,
Leyt nu versmacht,
Onder den Eycken boom.
Hoort nu de Nymphen singhen
Aenden Parnassi voet,
En Eycken tacxken bringhen
Voor die hem eer aendoet,
Pallas nu leeft,
Bellona beeft,
En verliest haeren moet.
Princen wilt u dan pooghen
Tot Godt die't al besiet,
Met sijn alsiende ooghen
Al wat op d'aerdt gheschiet,
V nu verheucht,
En groeyt in deucht
Doet dat 'tgheloof ghebiet.
FINIS.