Stemme: O deuchdigh proncksel, &c.
DEucht-same gheesten
Wilt niet medooghen
Dat t'Seraphinsche wicht ons soo verwint
Wilt sijn den meesten
Nochtans sijn ooghen
Heeft door sijn dertelheydt soo vast verblint,
Willen wy mallen
Moeten hem vlieden
Hy mocht ons door sijn hongersuchtigh vier
Seer licht doen vallen
Ende ghebieden
Te comen door de min in veel dangier.
Neemt nu een glaesjen
Laet noch eens drincken
Met een goet opset sonder rampspoets aert
Met cleyn gheraesjen
Laet eens vol schincken
Want op den naer smaeck ben verlackebaert,
Laet druck versterven
Mistroostich quelen
T'geen door den Nijdt wordt dickwils ingecropt,
Wilt vreught verwerven
Want in het spelen
Het smeeckigh leet wort met den wijn ghestopt.
FINIS.